Gúlshat Mammedova: «Asa qurmetti  qamqorshym! Bári de Sizdiń arqańyzda... (vıdeo)

Parlament depýtattarymen kezdesken Túrikmenstannyń prezıdenti Gýrbangýly Berdimuhamedov úkimet pen el aldyna jańa mindetter qoıdy. Túrikmenniń memleket basshysy minberde sóılegennen keıin ádettegideı depýtattar oryndarynan turyp, uzaq qol shapalaqtady.  

Odan keıin parlament tóraıymy Gúlshat Mammedova sóz alyp, depýtattar aldynda prezıdent Gýrbangýly Berdimuhamedovke aıryqsha alǵys sezimin bildirdi. Onyń sózi túrikmenniń buqaralyq aqparat quraldarynda jarııalanǵan joq. Mammedovanyń «Batyr Arkadag», «Qurmetti Arkadag», «Uly Arkadag» degen sózderi  depýtattardyń erekshe yqylasyn oıatty. Aıryqsha alǵys pen qol shapalaqtaýlar uzaqqa sozyldy (arkadag – qamqorshym-red).  Endi parlament tóraıymynyń sózin keltirelik...

«Asa qurmetti Arkadag! Elimizdiń zańdylyq qyzmetin nyǵaıtý maqsatynda Siz ózińizdiń altyn ýaqytyńyzdy qıyp, depýtattarmen kezdesýge keldińiz. Bul biz úshin – uly jol! Sol úshin Sizge aıryqsha yqylasymyzdy bildiremiz. Sizdiń ólsheýsiz eńbegińizdiń arqasynda bizdiń táýelsiz el jańa jetistikke jetti. Bul arqyly Siz Otanǵa, halyqqa erekshe mahabbatyńyzdy kórsettińiz.  Sizdiń sózińiz mıllıondaǵan júrekterdi bıik maqsatqa jetkizdi.

Zańǵa arqa súıegen memleket eń myqty el bolyp sanalady. Sizdiń búgingi sózińiz halyqqa qamqorlyǵyńyzdy, ár adamǵa, ár oshaqqa degen erekshe kózqarasyńyzdy taǵy da kórsetti.

Búkil túrikmen halqynyń qamqorshysy, qurmetti Prezıdent! Siz bizge senetinińizdi aıttyńyz. Sizdiń senimiz bizdi kún demeı, tún demeı jumys isteýge jigerlendiredi. Biz árıne aıryqsha yqylaspen jumys isteımiz!

Qurmetti, qamqorshymyz Arkadag! Bári Sizdiń arqańyzda júzege asyp jatyr. Sizge myqty densaýlyq tileımiz!

 ...Aıryqsha jalynmen sóılegen sózden keıin taǵy da uzaq qol shapalaqtaý. Adam da maqtaýǵa sonshalyqty masattanyp, kózin shel basady eken ǵoı.